Enzo D'Agata

Cadìu, ncalamitata,
comu un sfilazzu di cuttuni sciusu,
accostu a la cunocchia,
cu l'ardenza si scòpriri
la funti unni s'addentica l'amuri.


Nta na puzza nfirnali di pitroliu,
rispittusedda,
vardò la vamparigghia,
lu puzzu di lu vitru trasparenti,
e cu l'ali ncinniruti
desi centu assaccuni.


Li mìcrobbi,
sciacalli di casèntuli,
vidennu dda piddoscia
si cuggheru li pupi.


Lu càuru stagnò
l'ultima lagrima di gioia;
desi un suspiru e poi
s'addurmiscìu
cu l'occhi chini di munnu,
cu l'occhi chini di luci.


(Enzo D'Agata – da “Làcimi a focu lentu” - Edizioni Arte e Floklore di Sicilia, Catania, 1983)

FILASTROCCA DI LU POVIRU

Non quantu jungi c'è cu nasci poviru
cu la peddi caprigna, dura e rascusa
pi divintari pastu di li cimici
dintra la naca a ventu!

Non quantu jungi si diventa poviri!

Lu poviru non fu fattu di crita
ma di petra scavigghiata e lagrimi di sùrfaru
abbannunati na 'n-puzzu di sciara
unni nata la fami.
P'aviri la qualifica di poviru
bisogna fari scola
e pàtiri na la trincea di la vita,
cummàttiri scalcagnati e ùmili
jittannu sangu
e mòriri na burdelli e manicomii
pirchì poviri si nasci comu si nasci pueti!

Non quantu jungi si diventa poviri!

Quannu cuntànu storii
di "poviri duchi malati",
di "poviri re spudistati",
lu fannu p'abbuffuniari la miseria!

Non quantu jungi si diventa poviri!

Lu celu maturò trusci di nuvuli,
albi e tramunti tra roti di focu
llavancati na lu spaziu pi seculi.
Lu mari rivugghìu curaddi ed isuli
e sprufunnò carammi e pricipizii
cancillannu muntagni e cuntinenti
prima ca la Madonna parturissi
lu servu di li poviri!

ENZO D'AGATA

(da "Làcimi a focu lentu" - Edizioni Arte e Folklore di Sicilia-Catania)