Geppy Macaluso

Geppy Macaluso ,poetessa in lingua e in dialetto siciliano, in questa sua poesia esprime un sentimento e un amore profondo verso la Madonna delle Lacrime di Siracusa .I suoi versi sono musica celestiale che provengono dal profondo del cuore, e noi , che apprezziamo la vera poesia siamo onorati di accogliere una lirica. PIPPO

A Madunnuzza
chiangi
nâ casuzza
E
tutta a genti
’i Siracusa
curri
s’affudda
stritta stritta
nâ stratuzza
e cu na pezza
o un morsu
di cuttuni
ricogli
ddi lacrimi
’i duluri
di ranni
sofferenza
di dda Matri
ddi lacrimi
’i preghiera
di speranza
d’un capizzali
’i jssu
’na facci di Madonna
’ne ’na stanza
E di nne dd’occhi
ca
guardanu lu celu
scinni
lu chiantu amaru
di Maria
firmannusi
a la manu
ca
supra u Cori ’mmaculatu
teni
ca
di duluri
avvampa
e ranni Amuri
pû Figliu So’
e pi tutti
li figli
dû So’ Amuri
A capu chinu
si sfuj
lu rusariu
un murmurìu
assortu
suttavuci
Cci vju
cci vju
grida
’na picciridda
’mbrazza ô patri
ca felici
la spingi
’ncapu a fudda
e ô surdu
ca campava
’nfunnu ô mari
arriva
u sonu
dî canti
e dû pregari
U mutu
ca nun avìa
mai
dittu nenti
junci a so’ vuci
ê canti
di la genti
E ancora
’n angileddu
’i tri annuzzi
stenni a lu celu
facennu
ciau ciau
lu so’ vrazzuddu
mortu
e senza vita
E
ammenzu lu stupuri
generali
di nne ’na seggia a roti
’na carusa
si susi
sula sula
e a trantuliuni
si movi
a dd’altarinu
’mprovvisatu
Staju caminannu
dici
pianu pianu
largu facennusi
’ntra tutti
li persuni
A fudda
e’ muta
’mpitrata
di ’st’eventi
cu lu cori
strazzatu
poi
di bottu
scatta
’n on gran chiantu
dâ Madunnuzza
si senti
sutta u mantu
E
di ddi jorna
’mpoi
tutti li jorna
di tuttu
u munnu
a mila
a genti arriva
Priari voli
ê pedi
’i ddu quatrettu
pi contemplari
l’occhi
di la Matri
di Nostra Matri
ch’è meravigliusa
a Madunnuzza
ca chiangi
’i Siracusa
Geppina Macaluso
poesia tratta dal libro : Geppina Macaluso “Azzurrucelu”,Target Editrice 2002